Колдонуучу катары кирүү
 
 
 
Жарыялар
   

Биздин долбоорду колдоп, достор менен бөлүшүңүздөр

 

Кантип стерва болуу керек?
7:26, 11-август 2019
Кантип стерва болуу керек?

Бардык эле кыздар кандай гана жерде болбосун өзүнө ишенип, кылык-жоругу, кийинүү стили менен тегеректегилердин көңүлүн бурдурууну каалашат. Ушундан улам “стерва” деген терминди жана андай болуунун жолдорун ойлоп табышкан. 
Стерва болууну үйрөткөн атайын китептер бар. Алардын негизги максаты жүдөгөн кызды өзүнүн күчүнө ишенген, өзүнүн баасын билген, жарашыктуу кийинген, боёнгон кызга айландыруу. Бирок косметика, кийим, бут кийим жана башкалар үчүн акча керек да. Демек, бай, жок эле дегенде анча чоң эмес акчасы бар айымдар стерва боло алышабы? Андай десең карапайым эле айымдар да стерва болууну үйрөтүүчү китептерди сатып алышат. 
Стервология китептери дүйнөгө азгыруучунун көзү менен кароого чакырат. Эң башкысы, сырткы келбетке кылдат мамиле жасоо. Негизги кредо – сулуу болуу. Стервалар үчүн жалпы эреже иштелип чыккан: өзүнүн кызыкчылыгын башкалардыкынан өйдө коюу, убакытты жана максатты белгилөө, пландарды ишке ашыруу үчүн көп маалыматтарды чогултуу, ийгилик үчүн акысын кайтарууга даяр болуу, артка кылчайбастан чечкиндүү кадам жасоо. 
Стервалардын чөйрө менен мамилесинин өзгөчөлүгү мында: аны жактырган жана туураган адамдар аны курчап турганы менен ал жалгыз бойдон кала берет. Балким жаман жери ушундадыр. Анын жашыруун, муздак мамилеси кимдир бирөөгө ишенүүгө жана жок дегенде бир секунд өзүн аялзаты сезүүсүнө тоскоолдук кылат. Алсыздык – “темир аял” үчүн таптакыр туура келбеген мүнөз. Балким ушундан улам андан эркектер алыстап турса керек. Муздак мамиле жасаган эркек мүнөздүү сулуу аларды коркутат. 
Психолог Лилия Мустафина мындай дейт:
-Стерва болуу азыркы учурда модалуу. Ал каалаганынын баарына жетет деген ой калтырат. Албетте, бул биринчи иретте ар бир кыз карьераны кыялданганына байланыштуу, стерва болуу карьералык тепкичтен көтөрүлүүгө тоскоол болгон факторлордон коргойт. Анын үстүнө стерва жөнүндө маалымат каражаттарында көп айтылат. Мурда мындай түшүнүк, мындай типтеги айымдар жок болчу. Азыр стерва болуу - сыймык.
Стерва болууга аракет кылган кыздарды карап туруп алар идеалдуу болгонго аракет кылат десе болот. Анткени коомчулукта өзүн абдан жакшы алып жүрүү, бардык темада маектеше билүү, жакшы кийинүү, боёнуу керек да. Анын үстүнө психологдордун көп жылдык байкоосунда белгилүү болгондой адамдарга жандуу, стандартсыз, белгилүү бир рамкага камалбаган кыздар жагат. 

Жылан менен достошконго барабар 
 
Менимче, стерва жакшы курбу боло албайт дегенге да болбойт. Эгер момун, ак көңүл кыз болсоң сага карама-каршы мүнөздөгү курбунун кереги тиет. Анткени белгилүү бир учурларда өзүңө ишенүүңө, максатка умтулушуңа, көңүл бурган мырзаларды караштырууга жардам берген бирөө болушу керек да. Көрүнүктүү болууга, өзүңө ишенип, өз алдыңча болууга стерва-курбу жардам берет. Достугуңар бекем болсо эч качан кыйын мезгилде таштап кетпейт, курбусун бирөөгө кор кылбайт. Стерва – мүнөздүн бир түрү эмес, керектүү жерде, керектүү учурда өзүнүн куралын колдонуу. Көбүнчө кыздар белгилүү бир жыйынтыкка жетишүү үчүн стерва болушат, а курбулары менен таптакыр башкача мамиледе. 
Бирок экинчи жагы да бар. Стерва менен достошуу жылан менен достошкон сыяктуу эле. Күтүлбөгөн жерден уусун чачып, жашооңду ууландырып коюушу мүмкүн. Көбүнчө ал психологиялык жактан алсыз кыздар менен достошот, оңой азгыруу үчүн. Бактылуу жашооңду ал көрө албайт. Курбусу жакшы көйнөк алдыбы, стерва андан да жакшысын алышы керек, курбусу жакшы жигит менен тааныштыбы, аны тартып алуу керек. Жигит жакпаса деле тартып алып өзүн көрсөтүү керек. Стерва өзүн ханыша сезет, курбусу анын кызматчысы болуп жүрүү керек. 
Курбулардын экөө тең стерва болсо андан да жаман. Алар кызыкчылыктары окшош болгону үчүн достошушат. Чогуу болгондо бири-бирине жагалданышат, бири-бирин макташат, кеткенден кийин болушунча жамандашат. Мындай курбулар бири-биринен жакшылык күтө алышпайт, ар бири өз кызыкчылыгын ойлойт. 

Стерва болуунун эрежелери 
 
1-эреже. 
Өзүңдү бош кой. Башка адамдарга, алардын ишине негизсиз тынчсыздана бересиңби? Тынчсыздануу сенин ден соолугуңду, күчүңдү алып жатабы? Сенин курмандыктарың бааланбай калганы үчүн өкүнъп жатасыңбы? Токто. Стерванын энергиясын коротууга анын ата-энеси жана балдары гана татыктуу. Өзүңдүн энергияңды сактап, аны эс алууга, ырахат алууга, акылыңды, денеңди жакшыртууга, саламаттыгыңды бекемдөөгө коротосуң. А курбуларың, мырзаларың өздөрүн өздөрү камсыздай алышат. Албетте, жардамыңды сунуштасаң болот, аны кабыл алууга көндүрүүгө милдеттүү эмессиң. Ар ким өзүнө жооп берет, бирөөнүн жашоосун көзөмөлдөй албайсың. Стерва ички күчү чектелүү экенин билет, ал баарына жетпейт, ошондуктан бир татыктуу объектти тандап алышы керек. Ал кимдир бирөө болушу мүмкүн. Стерва үчүн кимдир бирөөнүн келечегинин мааниси чоң. Ал албетте өзү.
2-эреже. 
Өзүңө кызыгышың керек. Жан дүйнөңдү жана денеңди өнүктүр. “Мага коон жыттуу ванна үчүн көбүк жагабы? Мага кандай китеп жагат? Күлгүн түс мага жарашабы?”. Стерва өзүнө өзү канааттанып, ырахаттануу менен ички аурасын түзөт. Аны сыртка чыгарып, адамдарды өзүнө тартат. Жыттуу шамдын жардамы менен бөлмөнү жагымдуу жыт каптайт. Жеке өзүңө болгон ички кызыгууң шамдын отуна окшош, бул жылдыздуулугуңду арттырат. Кызыктуу, ынтаалуу, камкор шеригиң – Өзүң менен убакытты жакшы өткөрсөң жалгыздыкты кыйын деп кабыл албай каласың. Аны эркектер коомчулугуна алмаштырууга шашпай каласың. Демек үчүнчү эрежеге өтсөң болот.
3-эреже. 
Талап кыл! Эркектерди тандоодо дүкөнгө кирген тажрыйбалуу кардар сыяктуу кыйкымчыл бол, буюмдар биринен бири жакшы болуп турса да эң жакшысын тандап ал. Стерва жөн гана керектөөнү кандыруу үчүн бир нерсени сатып албашы керек. Ага жөн гана эркек керек эмес. Шанель көйнөк жөнүндө айткан: “Эгер сенин шкафыңда илинип турган көйнөктү кийип театрга барууга болбосо, анда эмне үчүн ал азыркыга чейин бул жерде турат?”. Стерва эркектер жөнүндө ушуга окшош ой жүгүртөт. “Эгер сен өзүңдү эркектин жанында эң сонун, кам көрүүгө, сүйүүгө татыктуу айым сезбесең, анда эмнеге аны менен жүрөсүң?”. Стерва билет өзүнүн башкалар тарабынан көңүл бурууга, сүйүүгө татыктуу экенин. 
4-эреже. 
Ойно. Жашоо – бул казино. Кызыл-кара оюн талаасында келишимдүү, акылдуу, бай эркектер бар. Кээде зеро туш келип калат. Казиного акча табуу үчүн эмес, сайрандоо үчүн келишет. Стерва өзүн акчага муктаж эмес айым катары алып жүрөт, бирок курч сезим үчүн акысын бергенге даяр. Муздак шампанды ичип, ырахат алып жүрө бер. Оюнду утушту көздөбөй эле кой. Эгер оюнду жакшы көрсөң, утасыңбы, утпайсыңбы анын айырмасы жок да. 
5-эреже. 
Акчаны аяба! Стерваларга эң ылайыктуу кийимдер юбка, топик, туфли, жасалгалар жана албетте, косметика. Майрамдарда гана эмес, кадимки күндөрдө да азгыруу керек, жеңүү керек. Ар бир жеңиш кылдат машыгуунун жардамы менен келет. Өзүңдө текебердикти, күчтүүлүктү өнүктүр, өзүңдүн бийлигиңди аңдап бил. 
 

P.S. Барган сайын стервалар көбөйүп баратабы дейм... Кыздардын өзүнө кам көрүп, максатка умтулуп, ийгиликке жетип жүргөнү жакшы, бирок “кыздын кыздай, кыштын кыштай болгону жакшы” дегендей аялзатынын табиятына тиешелүү назиктик, боорукердик, мээримдүүлүк сапаттарын жоготпосок экен. 
 

Даярдаган Назира МАНАС кызы

 
Кароолор (126)
 
 

 

Комментарий кошуу

Комментарий калтыруу үчүн каттоодон өтүңүз
же соцтармактар аркылуу кириңиз

 



Top.Mail.Ru